Samkvæmt rekstrarreikningi ársins námu rekstrartekjur A og B hluta Garðabæjar 11.701 milljónum króna. Ári áður voru tekjurnar 10.725 milljónir króna, en þetta er hækkun milli ára sem nemur 9,1%. Rekstrargjöld A og B hluta, þ.e. laun og launatengd gjöld, annar rekstrarkostnaður og afskriftir námu á árinu 11.155 milljónum króna en voru 9.990 milljónir króna á árinu 2014. Hækkun frá fyrra ári nemur 11,7%.

Rekstrarniðurstaða Garðabæjar var því jákvæð um 165 milljónir króna á síðasta ári, en hún var jákvæð um 439 milljónir króna árið 2014. Eigið fé A og B hluta hækkar úr tæpum 11,5 milljörðum í lok árs 2014 í tæpa 11,9 milljarða í lok árs 2015. Skuldahlutfall bæjarins er 101% af tekjum, en hámarks skuldaviðmið er 150%.

Alls var framkvæmt í bænum fyrir 1,6 milljarð á árinu, og 662 milljónum varið til framkvæmda við fasteignir grunnskóla, þar af 478 milljónum til viðbyggingar Hofsstaðaskóla og 122 milljónum í framkvæmdir við uppsteypu nýs grunnskóla, Urriðaholtsskóla. 409 milljónir fóru til gatnagerðar og 125 milljónir í framkvæmdir við íþróttamannvirki en stærsta framkvæmdin í þeim málaflokki var nýr gervigrasvöllur á Álftanesi.

Gunnar Einarsson bæjarstjóri Garðabæjar:

„Það verður að teljast góður árangur að skila árinu 2015 með jákvæðri rekstrarútkomu, þegar horft er til þess að ríkið hefur ekki brugðist við áskorun sveitarfélaga um endurskoðun á tekjustofnum þeirra. Eins og staðan er í dag er vart hægt að segja að lögbundnir tekjustofnar sveitarfélaga standi undir þeim verkefnum sem þeim eru falin skv. stjórnarskrá og lögum. Hér má líka benda á að miklar launahækkanir urðu á árinu en sú skriða fór af stað með kjarasamningi ríkisins við framhaldsskólakennara. Þessi skriða reyndist sveitarfélögum mjög dýr, ekki síst vegna nýrra kjarasamninga grunnskólakennara sem komu í kjölfar framhaldsskólasamningsins.

Einnig er rétt að nefna að Garðabæ greiddi á árinu 146 milljónir króna með rekstri hjúkrunarheimilisins Ísfoldar þar sem daggjöldin sem eru ákvörðuð af ríkinu stóðu ekki undir kostnaði við reksturinn og loks hækkaði lífeyrisskuldbinding Garðabæjar um 248 milljónir króna á árinu í stað 145 milljóna eins og gert var ráð fyrir í fjárhagsáætlun. Þegar allt þetta er haft í huga er ljóst að það er aðeins vegna sterkrar fjárhagslegrar stöðu Garðabæjar og þess að vel hefur verið haldið utan um reksturinn á árinu að niðurstaðan er réttu megin við núllið.“