Japanski fjárfestingabankinn Nomura tilkynnti í dag að bankinn hefði keypt stóran hluta af starfssemi bandaríska fjárfestingabankans Lehman Brothers í Evrópu og Mið-austurlöndun en eins og kunnugt er varð Lehman Brothers gjaldþrota í síðustu viku.
Fram kemur á fréttavef BBC að Nomura mun yfirtaka fjárfestingabankastarfssemi Lehman Brothers á fyrrgreindum svæðum auk þess að yfirtaka eitthvað af eignasöfnun bankans.
Í gær var greint frá því að Nomura hefði þegar yfirtekið hluta af starfssemi Lehman Brothers í Asíu.
Fram kemur að Nomura mun starfrækja fjárfestingabankastarfssemi Lehman Brothers undir eigin nafni, þ.e. Nomura.
Þá kemur fram að „allflestir“ starfsmenn Lehman Brothers á svæðunum haldi vinnu sinni eins og það er orðað í frétt BBC en um er að ræða 2.500 manns.
Talsmaður PricewaterhouseCoopers, endurskoðendafyrirtæki Lehman Brothers í Evrópu sagðist í samtali við fjölmiðla vera „hæstánægður“ með yfirtöku Nomura.
Þá er tekið fram að engar skuldir fylgja með í kaupunum.