Jóhanna Sigurðardóttir forsætisráðherra hélt í gær til London þar sem hún hyggst sækja fund með forsætisráðherrum Norðurlandanna, Eystrasaltsríkja og Bretlands. David Cameron, forsætisráðherra Bretlands, bauð til fundarins sem lýkur í dag.
Markmið fundarins er að deila þekkingu og reynslu af verkefnum, bæði innan hins opinbera og einkageirans, einkum er varðar grænan hagvöxt, velferð og fjölskyldumál, og nýsköpun. Í undirbúningsferli fyrir fundinn var sérstök áhersla lögð á það að leiða saman sérfræðinga til að kanna samstarfsmöguleika og viðskiptatækifæri á fyrrnefndum sviðum.
Hvert þátttökuland kom til fundarins með fimm kynningar í farteskinu. Með Jóhönnu fóru Vilborg Einarsdóttir f.h. Mentors, Jón Ágúst Þorsteinsson, forstjóri Markorku, Soffía Gísladóttir f.h. Vinnumálastofnunar Norður- og Austurlandi, Margrét Pála Ólafsdóttir, forsprakki Hjallastefnunnar, og Helga Valfells, Nýsköpunarsjóði.