*

fimmtudagur, 22. ágúst 2019
Fólk 2. maí 2019 08:22

Jökull Sólberg frá Takumi til Parallel

Stofnandi Takumi, fyrrum vörustjóri Plain Vanilla, gengur til liðs við ráðgjafafyrirtækið Parallel.

Ritstjórn
Jökull Sólberg starfaði áður hjá Plain Vanilla, stofnaði svo Takumi en verður nú ráðgjafi hjá Parallel.
Aðsend mynd

Jökull Sólberg, stofnandi Takumi, hefur verið ráðinn til ráðgjafastarfa hjá Parallel ráðgjöf. Jökull var áður vörustjóri hjá tölvuleikjafyrirtækinu Plain Vanilla sem framleiddi leikinn QuizUp.

Árið 2015 stofnaði hann í kjölfarið Takumi sem er breskt fyrirtæki á sviði Instagram markaðssetningar með starfsstöðvar í London, New York og Berlín. Jökull var forstjóri Takumi en hefur nú stigið til hliðar til að ganga til liðs við Parallel sem ráðgjafi í verkefnum sem tengjast stafrænni vegferð.

Um Parallel

Parallel er tækniráðgjafafyrirtæki sem sérhæfir sig í ráðgjöf fyrir fyrirtæki í stafrænni vegferð. Fyrirtækið var stofnað af þeim Arndísi Thorarensen og Þórhildi Eddu Gunnarsdóttur en þær starfa einnig sem ráðgjafar hjá fyrirtækinu.

Aukin áhersla á stafræna og sjálfvirka þjónustu hjá fyrirtækjum og stofnunum sem og krafan um óaðfinnanlega notendaupplifun skapar þörf hjá fyrirtækjum um greiningu stafrænna tækifæra. Parallel hefur sérhæft sig á markaði í að greina slík tækifæri og stýra umbreytingu með virkri þátttöku í framkvæmd verkefna til að tryggja ávinning stafrænnar þróunnar.