Jón Ásgeir Jóhannesson, fyrrum aðaleigandi Baugs Group, hafnar því í yfirlýsingu sem hann hefur sent frá sér að bera ábyrgð á tapi lífeyrissjóðanna í Glitni. Þá segir Jón Ásgeir að skiptum í þrotabúi Baug sé ekki lokið og að forsvarsmenn lífeyrissjóðanna beri einir ábyrgð á fjárfestingum þeirra.

Þetta kemur fram í yfirlýsingu frá Jóni Ásgeiri í kjölfar nýrrar skýrslu um starfsemi lífeyrissjóðanna fyrir hrun. Í skýrslunni kemur fram að lífeyrissjóðirnir hafi tapað gífurlegum fjármunum, og þá helst vegna fjárfestinga í skuldabréfum og hlutabréfum tengdum Exista, Baugi og tengdum aðilum. Þegar skoðað er tap sjóðanna vegna skulda- og hlutabréfaeignar samtals nemur það 389,2 milljörðum króna og nam hlutdeild Baugs og tengdra fyrirtækja um 20% af heildartapinu.

Jón Ásgeir segir í yfirlýsingunni að sér finnist miður að lífeyrissjóðirnir hafi tapað fjármunum á Baugi. Hann hins vegar hafnar því sem fyrr segir að bera ábyrgð á tapi sjóðanna í Glitni og þess utan hafi hvorki hann né Baugur átt meirihluta í öðrum félögum sem listuð er upp yfir þau félög sem kostuðu lífeyrissóðanna hvað mest fjármagn, s..s Landic, FL Group og Teymi.

Þá segir Jón Ásgeir það koma á óvart að skýrsluhöfundar hafi ekki viljað heyra sjónarmið forsvarsmanna þeirra fyrirtækja, sem sérstaklega eru tilgreind í skýrslunni.

Loks segir Jón Ásgeir að „Hrunið“ verði ekki gert upp með skýrslunum sem eru einsleitar þar sem takmarkaður hópur fái aðgang að skýrsluhöfundum.

„Betur væri að það yrði sett upp sannleiksnefnd t.d á Alþingi og þar yrðu menn kallaðir fyrir líkt og gert er í Bandaríkjunum. Þá fengi þjóðin að heyra hvað gerðist í beinni útsendingu,“ segir Jón Ásgeir.

Hér að neðan má sjá yfirlýsingu Jóns Ásgeirs í heild sinni:

„Yfirlýsing frá Jóni Ásgeiri Jóhannessyni

Í tilefni þess sem kemur fram í lífeyrissjóðaskýrslunni að Baugur Group hf. hafi borið ábyrgð á 77 milljarða tapi lífeyrissjóðanna í gegnum beina og óbeina eignarhluti, vil ég vekja athygli á eftirfarandi staðreyndum:

Tvö fyrirtæki, sem voru undir yfirráðum mínum fengu lánsfjármagn frá lífeyrissjóðum. Þessi fyrirtæki voru Hagar hf. og Baugur Group hf. Hagar hf. greiddu upp allar skuldir alls 8. 7 milljarða með vöxtum við lífeyrissjóðina í október 2009 – á þeim tíma eitt íslenskra fyrirtækja.

Lán lífeyrissjóðanna til Baugs Group hf. voru að fjárhæð 4,8 milljarðar. Þessar lánveitingar námu 1,5% af efnahagi Baugs Group hf. og 1% af tapi lífeyrissjóðanna. Mér finnst miður að lífeyrissjóðir hafi tapað fjármunum á Baugi Group hf. Ég minni þó á að skiptum á þrotabúinu er ekki lokið og Baugur Group hf. hafði greitt þeim háar fjárhæðir í vexti á árunum á undan.

Ég hafna því alfarið að bera ábyrgð á tapi lífeyrissjóðanna á Glitni banka hf. Lífeyrissjóðirnir í landinu höfðu fjárfest í Glitni banka hf. frá stofnun hans, bæði í hlutabréfum og skuldbréfum. Lífeyrissjóðirnir voru stórir hluthafar bankans, þegar FL Group hf. eignaðist 29% í Glitni á vormánuðum 2007. Á þeim tíma átti Baugur 20% í FL Group hf. og átti því beint og óbeint 9% hlut í Glitni banka hf þegar mest var. Ég fellst ekki á að hægt sé að kenna mér eða Baugi Group hf. um 47 milljarða tap lífeyrissjóðanna á Glitni banka hf., sem er m.a. vegna fjárfestinga fyrir árið 2007, þegar ég eða aðilar mér tengdir höfðu engan snertiflöt við bankann né stjórnuðum fjárfestingum lífeyrissjóða hvorki þá né seinna. Til samanburðar má benda á að á sama tíma átti Baugur Group hf. um 14% hlut í bresku verslunarkeðjunni Debenhams. Engum heilvita manni hefði dottið í hug að telja skuldir Debenhams sem skuldir Baugs Group hf. Framsetning í skýrslunni er því mjög villandi.

Varðandi Landic hf., FL Group hf. og Teymi hf. þá voru þau fyrirtæki ekki undir meirihluta yfirráðum mínum eða Baugs Group hf., þó Baugur Group hf. hafi verið hluthafi í þessum fyrirtækjum. Þessi fyrirtæki fóru í gegnum nauðasamninga og eignuðust lífeyrissjóðirnir hlutafé í þeim. Hvers virði þau verða á endanum hefur ekki enn verið leitt í ljós – en umræða um að allt sé tapað er ábyrgðarlaus.

Það eru forsvarsmenn lífeyrissjóðanna, sem báru ábyrgð á fjárfestingum þeirra og engir aðrir.

Mér kemur verulega á óvart að skýrsluhöfundar hafi ekki séð ástæðu til að heyra sjónarmið forsvarsmanna þeirra fyrirtækja, sem sérstaklega eru tilgreind í skýrslunni. Þar virðisast vera viðhöfð sömu vinnubrögð og í rannsóknarskýrslu Alþingis. Því ekki gefur hún að öllu leyti rétta mynd af stöðunni.

Þá vil enn og aftur ítreka það að hrunið á Íslandi var ekki staðbundið við Ísland heldur gekk stórhluti vestræna ríkja í gegnum sömu hremingar. Íslenskir lífeyrissjóðir komust betur frá þeim hremingum en t.d. sjóðir í nágrannalöndum okkar í Evrópu. Hrunið verður ekki gert upp með skýrslunum sem eru einsleitar þar sem takmarkaður hópur fær aðgang að skýrsluhöfundum. Betur væri að það yrði sett upp sannleiksnefnd t.d á Alþingi og þar yrðu menn kallaðir fyrir líkt og gert er í Bandaríkjunum. Þá fengi þjóðin að heyra hvað gerðist í beinni útsendingu.

Jón Ásgeir Jóhannesson fyrrum aðaleigandi Baugs Group hf.“