Athafnamaðurinn Jón Ásgeir Jóhannesson, fyrrverandi forstjóri Baugs, og Ingibjörg S. Pálmadóttir tengjast fjölda mála sem tekin verða fyrir í Héraðsdómi Reykjavíkur í vikunni.
© Aðsend mynd (AÐSEND)
Eftir hádegi í dag verður tekið fyrir riftunarmál þrotabús Baugs gegn Fjárfestingafélaginu Gaumi, Eignarhaldsfélaginu ISP sem skráð er á Ingibjörgu, Gaum og Banque Havilland í Lúxemborg.
Þá verður í dóminum í fyrramálið fyrirtaka í máli Glitnis gegn 101 Capital, en Ingibjörg er stjórnarmaður í félaginu og fyrirtaka í meiðyrðamáli Jóns Ásgeirs gegn Birni Bjarnasyni, fyrrverandi dóms- og menntamálaráðherra sem skrifaði nýverið bókina Rosabaugur yfir Íslandi.
Ekki verður slöku slegið við þrátt fyrir annasaman morgun því eftir hádegið verður svo fyrirtaka í skaðabótamáli þrotabús Baugs gegn Jóni Ásgeiri.
Mál Ingibjargar verður enn á dagskrá á fimmtudag en þá sækir eignarhaldsfélag hennar mál gegn slitastjórn Kaupþings.
Eftir hádegið er svo fyrirtaka í enn einu riftunarmáli Baugs Group. Það tengist ekki alveg Jóni Ásgeiri nema óbeint en stefndi er Skarphéðinn Berg Steinarsson, nú forstjóra Iceland Express.
Jón Ásgeir er aftur í sviðsljósinu í héraðsdómi snemma á föstudagsmorgun en þá verður fyrirtaka í skaðabótamáli skilanefndar og slitastjórnar Glitnis gegn honum, Lárusi Welding, Pálma Haraldssyni, Magnúsi Arnari Arngrímssyni, fyrrverandi framkvæmdastjóra fyrirtækjasviðs Glitnis og Rósant Má Torfasyni, fyrrverandi fjármálastjóra Glitnis.
© Aðsend mynd (AÐSEND)
