Jón Björnsson hefur verið ráðinn sem verkefnastjóri hjá ráðstefnuborginni Reykjavík (Meet in Reykjavík). Markmið Ráðstefnuborgarinnar er að efla hlut funda-, ráðstefnu-, viðburða og hvataferða innan ferðaþjónustunnar.
Tekjur þessa hóps eru um tvöfalt hærri á hverja gistinótt en af hinum almenna ferðamanni og verður hlutverk Jóns að sækja stærri alþjóðleg verkefni til landsins að því er segir í fréttatilkynningu.
Jón hefur reynslu af verkefnastjórnun, markaðs- og sölumálum og síðastliðin ár hefur hann sinnt margvíslegum ráðgjafastörfum tengdum ferðaþjónustu.
Jón er með meistaragráðu í verkefnastjórnun frá Háskólanum í Reykjavík og er viðskiptafræðingur af markaðssviði við Háskóla Íslands.
„Við þær aðstæður sem ferðaþjónustan býr í dag hefur aldrei verið mikilvægara að leggja áherslu á að fá til landsins betur borgandi ferðamenn,“ er haft eftir Jóni í tilkynningunni.
„Ég hlakka til að vinna með aðildafélögum Meet in Reykjavík að því að auka hlutdeild þessa verðmæta hóps ferðamanna.“
