Jón Hákon Magnússon, fyrrverandi framkvæmdastjóri KOM, Kynningar og markaðar ehf, og fyrrverandi fréttamaður Sjónvarpsins andaðist á líknardeild Landspítalans 18. júlí, 72 ára. Þessu greinir Morgunblaðið frá.
Jón Hákon fæddist í Reykjavík 12. september 1941, foreldrar hans voru Svava Sveinsdóttir húsmóðir og Magnús Guðjón Kristjánsson skrifstofustjóri.
Jón Hákon lauk BA-prófi í stjórnmálafræði og blaðamennsku frá Macalester College í St. Paul í Minnesota, Bandaríkjunum árið 1964. Hann starfaði að námi loknu sem blaðamaður hér á landi og í Bandaríkjunum, var sölu- og markaðsstjóri hjá bílaumboðinu Vökli hf. og skrifstofustjóri hjá Flughjálp vegna Biafra stríðsins. Jón Hákon var blaðafulltrúi á 1100 ára afmæli Íslandsbyggðar 1974. Hann var fréttamaður á fréttastofu Sjónvarps RÚV 1970-1979. Hann stofnaði ásamt konu sinni KOM ehf., og var framkvæmdastjóri KOM frá 1986 til 2013. Jón Hákon seldi KOM ehf síðastliðin áramót.
Jón Hákon gegndi fjölmörgum félags- og trúnaðarstörfum. Hann sat m.a. í bæjarstjórn Seltjarnarness og var forseti bæjarstjórnar um tíma auk þess að gegna ýmsum trúnaðarstörfum fyrir Sjálfstæðisflokkinn. Jón Hákon annaðist rekstur fjölmiðlastöðvarinnar í tengslum við leiðtogafund Reagans og Gorbatsjovs 1986.
Jóns Hákon lætur eftir sig eiginkonu sína Áslaugu Guðrúnu Harðardóttur og börn þeirra tvö Áslaugu Svövu og Hörð Hákon.
