Jón Gunnar Margeirsson, framkvæmdastjóri flutningafyrirtækisins Jón & Margeir, hefur óskað eftir því að gera athugasemd við frétt Viðskiptablaðsins í síðustu viku þar sem fjallað var um gjaldþrot SB 12 ehf., sem áður hét Jón & Margeir.
Í fréttinni kom fram að lýstar kröfur í búið hafi numið 367,3 milljónum króna. Jón Gunnar segir í athugasemdinni að félagið hafi fyrir hrun tekið lán í jenum og frönkum og við hrunið hafi þau þrefaldast eins og önnur stökkbreytt gengislán.
„Eftir endurútreikninga Landsbankans fóru þessi lán niður í um 185 miljónir. Öll tæki voru keypt út úr félaginu fyrir gjald þrot af fyrirtækjunum Þorbirni, Vísi og Haustak,“ segir í athugasemd Jóns Gunnars.
„Kaupverð tækjanna var 135 milljónir króna og var það skuld fært inn á lán félagsins hjá Landsbankanum. Eftir stendur þá gjaldþrot upp á um 50 miljónir. Feðgarnir Jón Gunnar Margeirsson og Margeir Jónsson keyptu félagið af fyrrgreindum aðilum í febrúar 2011 og var þetta allt unnið í sátt við Landsbankann og aðra kröfuhafa. Hefur félagið Jón og Margeir ehf verið rekið frá 1. október 2010 á kennitölu síðan 2007. Jón og Margeir flutningar ehf voru stofnaðir 2010. Margeir Jónsson ehf á og rekur kranabíl og hefur sá rekstur alla tíð verið hans, eða síðan 1970. Í dag rekur Jón og Margeir ehf 8 vöruflutningabíla og er enn í viðskiptum við Landsbankann og önnur fyrirtæki sem félagið var í viðskiptum við.“