Landssamband veiðifélaga (LV) hefur kært frávísun Lögreglunnar á Vestfjörðum á kæru LV vegna sleppingar regnbogasilungs á Vestfjörðum til Ríkissaksóknara. Kæran laut að sleppingu á regnbogasilungi sem fundist hefur víða í ám um norðan- og vestanvert landið undanfarið ár.
Telur landssambandið að Matvælastofnun hafi ekki sérstakar valdheimildir til að rannsaka málið sem opinbert mál. Þá teljist það ekki skilyrði fyrir opinberri rannsókn að kæra hafi komið frá Matvælastofnun að því er segir í fréttatilkynningu landsambandsins. Er ákvörðun Lögreglunnar á Vestfjörðum frá 15. febrúar sl. um frávísun málsins því kærð, sbr. 6. mgr. 52. gr. laga. 88/2008.
Þá vilja þeir vekja athygli Ríkissaksóknara á því að starfsemi Matvælastofnunar sætir nú úttekt í kjölfar harðrar gagnrýni á stofnunina um að sinna ekki ábyrgðarhlutverki sínu eins og upplýst var í fjölmiðlum.
Telur landssambandið að málið sé til marks um að stofnunin hafi ekki uppfyllt lögbundið eftirlitshlutverk sitt og því nauðsynlegt að opinber rannsókn fari fram á á öllum þáttum þess.
