*

fimmtudagur, 2. desember 2021
Erlent 4. október 2021 16:02

Kalla eftir rannsókn á Facebook

Tveir meðlimir Evrópuþingsins kalla eftir að samfélagsmiðillinn verði tekinn til rannsóknar vegna skjala sem litið hafa dagsins ljós.

Ritstjórn
epa

Tveir meðlimir Evrópuþingsins hafa kallað eftir því að samfélagsmiðillinn Facebook verði tekinn til rannsóknar vegna skjala sem benda til þess að gróði sé fyrirtækinu ofar í huga en almannaheill. Reuters greinir frá.

Frances Haugen, fyrrverandi vörustjóri hjá Facebook, er sú sem lak innanbúðarskjölum úr röðum samfélagsmiðlarisans í fjölmiðla. Wall Street Journal hefur m.a. fjallað ítarlega um skjölin.

Sjá einnig: Vissu að Instagram væri skaðlegt táningum & Skella skollaeyrum við mansali og dópi 

Christel Schaldemose, sem situr á þinginu fyrir hönd Danmerkur og er annar þingmanna sem fer fram á rannsóknina, segir að skjölin sýni fram á mikilvægi þess að stóru tæknifyrirtækin komist ekki upp með að sjá sjálf um að regluvæða sig.

Alexandra Geese, fulltrúi Þýskalands á þinginu, tekur í sama streng og segir þetta mál undirstrika þörfina fyrir strangari reglur sem tæknifyrirtæki þyrftu að lúta, en slík tillaga hefur einmitt verið lögð fram af Framkvæmdastjórn Evrópusambandsins.

Stikkorð: Facebook