Fyrr á þessu ári gerði Microsoft samning til fimm ára við NFL-deildina í amerískum fótbolta um að spjaldtölvur fyrirtækisins yrðu notaðar á hliðarlínunni af leikmönnum og þjálfurum í deildarkeppninni. Í samningnum fólst að Microsoft Surface yrði þannig opinber spjaldtölva NFL-deildarinnar.
Business Insider greinir hins vegar frá því að Microsoft hafi lent í vandræðum í fyrstu leikviku deildarinnar þegar sjónvarpslýsendur kölluðu spjaldtölvurnar í sífellu iPad sem eins og flestir vita eru spjaldtölvur frá fyrirtækinu Apple, helsta samkeppnisaðila Microsoft.
Líklegt þykir að Microsoft og NFL muni vinna að því að upplýsa sjónvarpslýsendur um rétt heiti spjaldtölvunnar fyrir komandi leiki.
