Karítas Diðriksdóttir hefur verið ráðin markaðsstjóri hjá íslenska barnafatamerkinu iglo+indi. Karítas er nýflutt til Íslands eftir 8 ára dvöl í New York, London og Þýskalandi. Hún starfaði síðast sem Director of Brand Partnerships hjá hátískufyrirtækinu Moda Operandi í New York þar sem hún vann m.a. með tískumerkjunum Marc Jacobs, Kenzo og Valentino. Karítas mun styðja við öran vöxt fyrirtækisins á erlendum og innlendum mörkuðum. Þetta kemur fram í fréttatilkynningu frá igo+indi.
Karítas er viðskiptafræðingur frá Háskólanum í Reykjavík og stundaði skiptinám við CBS í Kaupmannahöfn. Hún hefur starfað á fyrirtækjasviði hjá Straumi fjárfestingarbanka á Íslandi og í London, hjá fjármálafyrirtækinu SNL Financial í London og hjá Icelandair í Frankfurt.
iglo+indi hefur verið í miklum vexti frá stofnun fyrirtækisins árið 2008 og eru vörur þess nú seldar í 18 löndum. Öll hönnun og þróun á barnafötum iglo+indi fer fram hér á landi en allur fatnaðurinn er framleiddur í fjölskyldureknum verksmiðjum í Portúgal. Handteiknaðar myndir og mynstur, þægileg snið og GOTS vottuð mjúk lífræn bómull eru það sem gerir iglo+indi að skemmtilegu og einstöku merki fyrir börn á aldrinum 0-11 ára. Vörur fyrirtækisins eru seldar í 100 verslunum út um allan heim.
