*

laugardagur, 16. október 2021
Fólk 1. september 2021 12:00

Karl Eskil ráðinn til Samherja

Karl Eskil Pálsson mun sjá um að miðla fréttum á heimasíðu Samherja og samfélagsmiðlum félagsins.

Ritstjórn
Karl Eskil Pálsson
Aðsend mynd

Karl Eskil Pálsson fjölmiðlamaður hefur verið ráðinn til Samherja og mun hann miðla fréttum á heimasíðu og samfélagsmiðlum félagsins. Auk þess mun hann sjá um önnur verkefni á sviði upplýsingamála hjá Samherja, þar á meðal innri vef fyrirtækisins þar sem upplýsingum og fræðsluefni er komið til starfsfólks. Karl Eskil hóf störf í dag, að því er kemur fram í tilkynningu Samherja.

Karl Eskil er reyndur fjölmiðlamaður en hann starfaði í tvo áratugi á fréttastofu RÚV á Akureyri, var ritstjóri héraðsfréttablaðsins Vikudags, sjálfstæður blaðamaður og nú síðast dagskrárgerðarmaður á sjónvarpsstöðinni N4 á Akureyri. Sjávarútvegur hefur verið helsta sérgrein hans í fjölmiðlun, einnig umfjöllun um viðskipta- og mannlíf í landinu, sérstaklega á landsbyggðinni.

Karl Eskil Pálsson:

„Vegna starfa minna undanfarna áratugi þekki ég nokkuð til starfsemi og innviða Samherja, sem er án efa eitt tæknivæddasta sjávarútvegsfyrirtæki landsins og þar með í heiminum. Samherji er líklega með stærri nýsköpunarfyrirtækjum landsins. Í því sambandi nægir að nefna glæsilegan skipaflota, fullkomnar landvinnslur, skip sem getur geymt lifandi fisk í sér útbúnum tönkum og fyrirhugað landeldi í Reykjanesbæ. Listinn er reyndar lengri hvað nýsköpun varðar.

Hjá Samherja starfar lausnamiðað og dugmikið fólk, sem nær árangri við að þróa þetta framsækna og tæknivædda fyrirtæki, þar sem lögð er áhersla á gott og skapandi starfsumhverfi. Ég er sem sagt fullur tilhlökkunar og þakklátur fyrir að hafa verið munstraður um borð. Mörg stór verkefni eru í farvatninu hjá Samherja, sem félagið vill segja frá og upplýsa með vönduðum og traustum hætti.“