Katrín Jakobsdóttir, formaður Vinstri grænna var miðmælandi í viðtalsþættinum Á Sprengisandi á Bylgunni í morgun. Þar sagðist þáttastjórnandinn Sigurjón M. Egilsson sjá hana fyrir sér í framtíðinni sem fínan forseta og spurði hana hvort hún vildi verða forseti. „Ég hef ekki séð mig í því,“ sagði Katrín. Hún sagði „örfáir hafa nefnt það við mig en enginn fjöldahreyfing.“ Hún sagðist hafa fengið nokkrar áskoranir sem sér þætti vænt um, meðal annars eina frá ungri stúlku, grunnskólanema. „En ég hef nú ekki séð mig fyrir mér í þessu.“
Sigurjón spurði að í ljósi þess að Vigdís Finnbogadóttir sé eini kvenforsetinn sem við höfum átt hvort Katrínu fyndist nauðsynglegt að næsti forseti verði kona? „Ég myndi gjarnan vilja sjá góða konu í þessu embætti, algjörlega,“ sagði Katrín. Sigurjón gekk frekar á Katrínu sem sagði að lokum: „Ég segi alveg satt, ég hef ekki séð mig fyrir mér í þessu.“ Sigurjón spurði þá hvort hún væri að undirbúa framboð? „Nei ég er ekki að undirbúa framboð,“ sagði Katrín
Aðspurð um fólk sem segist mundu vilja kjósa hana ef hún væri ekki í flokknum sínum sagði Katrín að það væri krafa upp á að fólk vildi kjósa frekar persónur og að við þyrftum að innleiða það í ríkara mæli hér og að fylgja fordæmi Norðurlandanna í því.
Fjölbreyttari atvinna í framtíðinni
Aðspurð um framtíð Íslands segist hún þá myndi vilja sjá land sem byggist upp á miklu fjölbreyttari atvinnu en við höfum gert sögulega, að við getum líka passað upp á umhverfið og náttúruna. „Við höldum áfram að byggja upp nýsköpunina, þekkinguna, rannsóknirnar allt sem reiðir sig á hugvitið sem er ekki að ganga um og of á auðlindirnar. Við stýrum ferðaþjónustunni þannig að hún verði okkur gæfa. Ekki með því að rukka alla með ómarkvissum hætti heldur að stýra því til að mynda með aðgangstakmörkunum inn á viðkvæm svæði,“ sagði Katrín
Kvenfyrirmyndir skipta miklu máli
Katrín segist ekki hafa farið inn í stjórnmál nema vegna þess að þar voru kvenfyrirmyndir. Fyrirmyndir sem hún nefndi voru Kolbrún Halldórsdóttir og Vigdís Finnbogadóttir. Hún segir að fyrir konur skipti miklu máli hvað var gert á undan.