*

þriðjudagur, 12. nóvember 2019
Innlent 2. september 2019 16:29

Katrín fundar með Pence eftir allt saman

Forsætisráðherra hittir varaforseta Bandaríkjanna á Keflavíkurflugvelli áður en hann fer af landi brott.

Ritstjórn
Katrín Jakobsdóttir forsætisráðherra er formaður VG sem leiðir ríkisstjórn með Sjálfstæðisflokki og Framsóknarflokki.

Katrín Jakobsdóttir, forsætisráðherra, og Mike Pence, varaforseti Bandaríkjanna, munu hittast á fundi í tengslum við heimsókn hans til Íslands, eftir allt saman en eins og mikið hefur verið fjallað um tók Katrín fund verkalýðsfélaga norðurlandanna fram yfir fund með varaforsetanum.

Eins og Viðskiptablaðið sagði frá á sínum tíma kemur Pence til landsins 3. september, en margir hafa orðið til þess að gagnrýna ákvörðun hennar, þar á meðal formenn þingflokka, um að breyta ekki ferðaáætlunum sínum í tilefni komu fulltrúa helstu bandalagsþjóðar Íslendinga.

Fundurinn mun eiga sér stað í húsi Landhelgisgæslunnar á Keflavíkurflugvelli að kvöldi 4. september þegar forsætisráðherra kemur til landsins af fundum í Svíþjóð og Danmörku, áður en Pence mun halda af stað í heimsóknir sínar til Írlands og Bretlands.