Sjálfstæðismennirnir Pétur Blöndal og Árni Johnsen voru ekki á sama máli um kaup ríkisins á orkuauðlindum á Reykjanesi, jörðunum Kalmanstjörn og Junkaragerði, fyrir 1.230 milljónir króna.

Til snarpra orðaskipta kom á Alþingi við atkvæðagreiðslu í málinu og mótmæltu Sjálfstæðismenn flestir þeim harkalega.

Pétur sagði kaupin tilraun til að hækka verð á jarðhita í framtíðinni, varaði við þeim og sagði nei.

Flokksbróðir hans Árni Johnsen var hins vegar á öðru máli. Hann sagði verð alltof lágt, verðið ætti að vera allt að þrisvar sinnum hærra, nær fjórum milljörðum króna í stað rúmra 1,2 milljarða og studdi söluna.