*

laugardagur, 12. júní 2021
Innlent 11. maí 2021 20:29

Kaupa 20% hlut í Atlanta

Forstjóri flugfélagsins segir að stefnt sé að því að stækka flugflotann en félagið rekur í dag níu Boeing 747 fraktflugvélar.

Ritstjórn
Baldvin M. Hermannsson segir spennandi tíma framundan hjá Atlanta.
Eva Björk Ægisdóttir

Baldvin M. Hermannsson, forstjóri Flugfélagsins Atlanta ehf, hefur ásamt hópi lykilstarfsmanna keypt 20% hlut í Atlanta og tengdum félögum. Samningar þess eðlis hafa verið undirritaðir og er kaupverðið trúnaðarmál milli samningsaðila að því er fram kemur í fréttatilkynningu.

„Eftir að hafa tekist á við afar krefjandi verkefni í kjölfar COVID faraldursins er Flugfélagið Atlanta nú reiðubúið til að taka næstu skref inn í framtíðina, ásamt frábæru starfsfólki. Félagið stendur styrkum fótum og sveigjanleiki okkar með þann flugflota sem við höfum yfir að ráða gefur okkur tilefni til bjartsýni. Sameinað og öflugt stjórnenda- og eigendateymi félagsins hlakkar til komandi verkefna,“ er haft eftir Hannesi Hilmarssyni, stjórnarformanni Atlanta, í tilkynningunni.

Að sögn Baldvins undirstrika kaupin þá miklu trú sem hann og lykilstarfsmennirnir hafa á flugfélaginu og framtíðaráætlunum þess.

„Við ætlum að halda áfram að stækka og eflast á komandi árum. Við munum bæta enn frekar við flugflotann, stækka markaðssvæði okkar og hlutdeild á markaði og framundan eru afar spennandi tímar,“ er haft eftir Baldvin.

Flugfélagið Atlanta rekur nú níu B747-400 fraktflugvélar og er starfsstöð þess á Íslandi. Einnig eru forráðamenn félagsins að vinna að stofnun flugfélags á Möltu. Um 200 starfsmenn starfa fyrir Flugfélagið Atlanta ehf. á Íslandi og í tilkynningu segir að félagið hafi á síðasta ári skilað um 7 milljörðum króna til íslenska hagkerfisins.

Fjallað var um Atlanta í Viðskiptablaðinu í síðustu viku, þar sem meðal annars var greint frá því að reksturinn hefði gengið framar vonum í fyrra og stefnt væri að sjö milljarða króna arðgreiðslu til eigenda.