Kaupfélag Skagfirðinga vinnur um þessar mundir að því að kaupa Bitruháls 2 í Reykjavík þar sem Osta- og smjörsalan var áður til húsa. Er markmið félagsins að sameina Esju kjötvinnslu Kjötbankanum og Gallerí Kjöti í húsnæðinu en fyrirtækin eru öll í eigu kaupfélagsins. Þetta kemur fram í Fréttablaðinu í dag.
Haft er eftir Ágústi Andréssyni, forstöðumanni Kjötafurðastöðvar KS, að tilgangurinn sé „að koma okkur vel fyrir á aðalmarkaðnum á höfuðborgarsvæðinu með aðstöðu til ákveðinnar framleiðslu, úrvinnslu á afurðum okkar og sölu og dreifingar.“
Markmið kaupfélagsins er að efla markaðshlut sinn í kjötframleiðslu með þessum hætti. Kaupfélag Skagfirðinga á fyrir stóran hlut í sláturhúsinu á Hellu, sláturhúsið á Sauðárkróki og helminginn í sláturhúsinu á Hvammstanga. Í kjötafurðastöðinni í Reykjavík verði unnið með lamb, naut og svín, meðal annars frá Stjörnugrís og Ali.
Í fréttinni segir jafnframt að Samkeppniseftirlitið telji samruna KS sölu, dótturfélags KS, Esju Gæðafæðis og Gallerís Kjöts ekki valda því að markaðsráðandi staða myndist.