Stjórnir Kaupþings [ KAUP ] og Spron [ SPRON ] hafa samþykkt samrunaáætlun um að Kaupþing yfirtaki eignir og skuldir SPRON með samruna félaganna.
Samruninn hefur óveruleg áhrif á heildarstærð Kaupþings á samstæðugrundvelli samkvæmt tilkynningu til Kauphallarinnar.
Við samrunann fá hluthafar í Spron sem endurgjald sem svarar til markaðsvirðis Spron við lok viðskiptadags þann 30. júní 2008 að viðbættu 15% álagi. Þetta leiðir til þess að greiddar eru sem nemur 3,83 krónur fyrir hvern hlut í Spron. Endurgjaldið verður samsett með þeim hætti að 60% þess verða í formi hluta í Exista hf. og 40% í formi hluta í Kaupþingi.
Fram kemur í tilkynningu til Kauphallarinnar að stjórnir félaganna telja að samruninn hafi jákvæð áhrif á starfsemi félaganna á Íslandi.
„Samruninn er til þess fallinn að bæta þjónustu, auka arðsemi í rekstri og virði fyrir hluthafa. Órói á fjármálamörkuðum undanfarin misseri hefur gert það að verkum að auka þarf áherslu á hagræðingu og hagkvæmni í rekstri fjármálafyrirtækja,“ segir í tilkynningunni.
„Með sameiningu Kaupþings og SPRON er verið að bregðast við breyttu rekstrarumhverfi og styrkja starfsemi félaganna á íslenskum fjármálamarkaði. Við sameininguna verður lögð áhersla á að viðhalda sérstöðu þeirra og markaðsstöðu.“
Þá kemur fram að útibú beggja verða áfram rekin undir eigin merkjum.
Tengdar fréttir:
Sameining háð samþykki yfirvalda og hluthafa Spron
Hluthafar í Spron fá greitt með hlutafé í Kaupþing og Exista
