Yfirskattanefnd hefur staðfest úrskurð Skattsins í máli fyrrverandi framkvæmdastjóra hjá Kviku banka og forvera hans, um að tekjur hans af kauprétti í bankanum skuli skattleggjast sem launatekjur hans. Engu máli skipti þótt nefndur starfsmaður hefði greitt gangvirði fyrir réttindin.

Um var að ræða annað kaupréttarkerfi bankans en forveri þess, sem fólst í útgáfu B-hluta í bankanum, hafði áður fallið á prófi skattyfirvalda. Téðir kaupréttir, sem undir voru í málinu, voru aðeins veittir fámennum hópi lykilstjórnenda en við verðmat á réttindunum var byggt á svokallaðri Black-Scholes aðferð.

Í fyrri réttarframkvæmd hefur verið miðað við að áskriftarréttindi, sem veitt eru starfsmönnum í tengslum við starf þeirra og undir markaðsvirði bréfanna, skuli eigi skattleggja sem fjármagnstekjur heldur sem launatekjur starfsmanna. Málið nú var frábrugðið þeim fyrri í ljósi þess að greitt var fyrir réttindin. Byggði gjaldandi málsins á því að réttindin hefðu ekki verið veitt í tengslum við starf hans og þar með ekki starfstengd hlunnindi. Á þetta féllst Skatturinn ekki og hið sama gilti um yfirskattanefnd.

„Fyrir liggur í málinu að hin umdeildu áskriftarréttindi að nýju hlutafé X hf., sem bankinn gaf út á árunum 2014 og 2016, voru eingöngu seld fámennum hópi æðstu stjórnenda og lykilstarfsmanna bankans á greindum tíma. Ekkert hefur komið fram um það í málinu að aðrir en umræddir stjórnendur bankans hafi átt kost á kaupum áskriftarréttinda að hlutafé í bankanum á þeim tíma sem um ræðir eða að sala réttindanna til annarra aðila hafi verið ráðgerð af hálfu bankans.