Sænska lággjaldaflugfélagið FlyMe Europe AB hefur samþykkt kaup á 51% hlut í breska flugfélaginu Astraeus kaupverðið og hljóðar upp á sex milljónir punda (790 milljónir króna), segir í frétt Dow Jones.
Viðskiptablaðið greindi frá þessu fyrr í morgun.
49% hlutur er í eigu Aberdeen Asset Management og stjórn flugfélagsins.
Finn Thaulow, nýr forstjóri FlyMe, segir að mikil samlegðaráhrif séu hjá flugfélögunum, þannig nýtist flugvélafloti félaganna betur á ársgrundvelli.
Aðalstarfsemi Astraeus er á Gatwick flugvellinum og eru farþegar flugfélagsins um 800.000 á ári. Tekjur félagsins eru um 11,4 milljarðar króna á ári og á félagið tíu Boeing farþegaþotur.
Fons, sem stjórnað er af Pálma Haraldssyni og Jóhannesi Kristinssyni, er stærsti hluthafinn í FlyMe með rúmlega 20% eignarhlut.
