Fyrirtækið Ró-Box, sem er í eigu nemenda við Tækniskólann, var valið fyrirtæki ársins 2019 í samkeppni Ungra frumkvöðla, Junior Achievement á Íslandi. Mun Ró-Box keppa fyrir hönd Ísland, í Evrópukeppni Ungra frumkvöðla, sem fram fer í Lille, Frakklandi dagana 3. – 5. júlí 2019, á 100 ára afmæli JA á heimsvísu.
Eins og Viðskiptablaðið sagði frá í byrjun síðasta mánaðar þegar keppendur kynntu vörur sínar á Vörumessu ungra frumkvöðla voru um 120 fyrirtæki stofnuð til að taka þátt í keppninni að því er Petra Bragadóttir framkvæmdastjóri samkeppninnar hér á landi sagði frá.
Hugmyndin á bakvið sigurvegarann í þetta sinn, Ró-Box er að vera einkahlutafélag sem selur róbota-kit fyrir krakka. Róbota-kittin eru einföld, með íslenskum leiðbeiningum og ætluð til að hjálpa krökkum að læra á tækni og forritun. Hér fyrir neðan má sjá lið Tækniskólans kynna hugmynd sína á keppninni.
© Aðsend mynd (AÐSEND)
Tuttugu fyrirtæki frá 13 framhaldsskólum, voru valin úr hópi 120 fyrirtækja, til að taka þátt í úrslitum Ungra frumkvöðla 2019.
Eftirfarandi hlutu verðlaun:
- Fyrirtæki ársins 2019: Ró-Box (Tækniskólinn)
- Fyrirtæki ársins - 2. Sæti: Blakkur (Borgarholtsskóli)
- Fyrirtæki ársins - 3. Sæti: Karma (Menntaskólinn í Kópavogi)
- Áhugaverðasta nýsköpunin: Fruss (Menntaskólinn við Hamrahlíð)
- Besti Sjó-Bisnessinn: Haf hársprey (Verslunarskóli Íslands)
- Fallegasti sölubásinn: Sylque (Verslunarskóli Íslands)
- Besta matvælafyrirtækið: Gen-Yo (Kvennaskólinn í Reykjavík)
- Bestu markaðsmálin: Hafmey (Menntaskólinn við Sund)
- Umhverfisvænasta lausnin: Vei!(Fjölbrautaskólinn í Garðabæ)
- Besta tæknilausnin: iRadar (Verslunarskóli Íslands)
- Samfélagsleg nýsköpun: Tilfinningamolar (Borgarholtsskóli)
- Besta fjármálalausnin: Ungdómur (Fjölbrautaskólinn við Ármúla)
- Besta hönnunin: A Bag Project (Fjölbrautaskólinn í Garðabæ)
Með fyrirtækjasmiðjunni er frumkvöðlastarf kynnt fyrir framhaldsskólanemum með það að markmiði að efla frumkvöðlaanda meðal ungmenna og þjálfa frumkvöðla framtíðarinnar. Árið 2019 tóku 560 nemendur í 13 framhaldsskólum þátt og er útlit fyrir að fjöldinn verði enn meiri á næstu árum. Markmiðið er að gefa meirihluta íslenskra nemenda færi á að kynnast frumkvöðlastarfi af eigin raun í námi sínu.
Um Unga frumkvöðla – Junior Achievement
Junior Achievement (JA) eru alþjóðleg félagasamtök sem starfa á heimsvísu en verkefni á vegum samtakanna snerta meira en tíu milljónir nemenda á ári hverju í 122 löndum, þar af yfir fjórar milljónir nemenda í 40 Evrópulöndum.
Samtökin leitast við að undirbúa ungt fólk fyrir framtíðina og auka færni þeirra til atvinnuþátttöku og atvinnusköpunar með því að stuðla að aukinni nýsköpunar-, frumkvöðla- og viðskiptamenntun í skólum. JA á Íslandi er þátttakandi í JA á heimsvísu sem verða 100 ára á þessu ári.
Verkefninu Ungir frumkvöðlar er ætlað að efla íslenska nýsköpunarmenningu með átaki sínu í framhaldsskólum og bætast þar með við þau átaksverkefni sem fyrir eru á háskólastigi (Startup Reykjavík, Startup Energy Reykjavík) og á grunnskólastigi (Nýsköpunarkeppni grunnskólanna). Öllu þessu starfi er ætlað að hvetja unga fólkið til þess að tileinka sér nýsköpun í starfi sínu og námi.
