Svissnesk heilbrigðisyfirvöld tilkynntu Kerecis í þessari viku að sáraroð fyrirtækisins hafi verið samþykkt sem meðhöndlunarúrræði á Svissneskum spítölum og göngudeildum. Þar með er Sviss fyrsta Evrópulandið sem samþykkir sáraroðið sem meðhöndlunarúrræði bæði á spítölum og göngudeildum og greiðir fyrir notkun á báðum stöðum.
Samþykkið er sagður mikilvægur áfangi fyrir Kerecis í fréttatilkynningu frá fyrirtækinu sem og fyrir útbreiðslu sáraroðs sem almenns meðhöndlunarúrræðis fyrir erfið þrálát sár sem leitt geta til aflimunar.
Fyrir er sáraroðið selt í nokkrum Evrópulöndum en engöngu til spítalanotkunar. Kerecis hefur átt í viðræðum við Svissnesk heilbrigðisyfirvöld undanfarin tvö ár og hafa jákvæðar niðurstöður í stórum klínískum prófunum sem Kerecis hefur tilkynnt um undanfarin misseri átt mikilvægan þátt í að afla samþykkisins.
Keyptu svissneskt samstarfsfyrirtæki
Samhliða viðræðum við Svissnesk heilbrigðisyfirvöld, hefur Kerecis verið í viðræðum um kaup á sárafyrirækinu Phytoceuticals í Zurich til að geta selt vöruna með eigin sölumönnum til svissneskra heilbrigðisstofnanna.
Kerecis hefur gengið frá kaupunum og fær með því 4 sölustarfsmenn í Sviss auk annara starfsmanna. Með þessu er Kerecis með 25 sölumenn í Bandaríkjunum, einn á Íslandi og 4 í Sviss. Allir þessir sölumenn eru að selja beint til heilbrigðistofnanna. Auk þess selur Kerecis vörur sínar gegnum umboðssölumenn og dreifingaraðila.
Eftirspurn eftir nýjum meðhöndlunarúrræðum í Sviss fyrir sykursýkissár er mikil. Í Sviss búa 8,5 milljón manns og í landinu er afskaplega vel þróað heilbrigðiskerfi. Svisslendingar verja næst mest allra þjóða í heilbrigðismál og eru Bandaríkin eina þjóðin sem ver hærra hlutfalli af þjóðarframleiðslu í þann málaflokk.
Tíðni sykursýki hefur tvöfaldast á síðustu 15 árum í Sviss og er talið að 50.000 manns þjáist þar af sykursýkissárum og að 7500 séu aflimaðir árlega vegna þeirra.
Guðmundur Fertram Sigurjónsson , forstjóri Kerecis segir þetta vera mikilvægt skref fyrir félagið á Evrópumarkaði. „Það eru hinsvegar 50 lönd í Evrópu og gríðarmikil vinna að sannfæra heilbrigðisyfirvöld í þeim öllum um að greiða fyrir vöruna,“ segir Guðmundur Fertram.
„Það hefur gengið vel hjá okkur að selja sáraroðið á Bandaríkjamarkaði og höfum við nú þrefaldað söluna þar þrjú ár í röð. Með þessari ákvörðun Svissneskra heilbrigðisyfirvalda er aðgangur Svisslendinga orðin sá sami að roðinu og Bandaríkjamanna.“ Guðmundur Fertram segir Sviss ákjósanlega áherslumarkað fyrir Kerecis vegna þess hve mikið þeir verja í heilbrigðismál.
„Við höfum undanfarna mánuði verið að skoða Phytoceuticals sem mögulegan samstarfsaðila í Sviss og eftir ítarlega skoðun ákveðið að kaupa fyrirtækið. Eftir kaupin rekur fyrirtækið auk höfuðstöðva fyrirtækisins á Ísafirði, starfstöðvar á DC svæðinu í Bandaríkjunu, í Reykjavik, í Zurich og er fjöldi starfsmanna um 80 manns.“
Eduardo Theiler forstjóri Phytoceuticals segir það stórfrétt að svissnesk heilbrigðisyfirvöld hafi samþykkt notkun og greiðslu á Kerecis Omega3 sáraroðinu í Sviss. „Við höfum undanfarið ár unnið að því að kynna rannsóknargögn Kerecis fyrir svissneskum heilbrigðisyfirvöldum og læknum,“ segir Theiler.
„Þessi vinna hefur nú leitt til þess að varan er greidd í Sviss og næsta skref er að ná til sem flestra heilbrigðisstofanna í Sviss sem meðhöndla hinn ört vaxandi hóp sjúklinga sem þjást af sykursýki og sykursýkissárum.“
