Kínversk stjórnvöld hafna því að þau geri kínverskum notendum erfitt að nota Gmail, tölvupóstsþjónustu Google. Þau segja ásakanirnar óásættanlegar.
Google sagði í gær að svo virtist sem ástæða bilunar á Gmail í Kína væri vegna afskipta stjórnvalda. Félagið sagði að vandamálið væri látið líta út líkt og Gmail væri bilað.
Segja má að samskipti stjórnvalda í Kína og Google hafa verið slæm og stórfyrirtækið og heimsveldið tekist á vegna netþjónustu Google. Áður hefur Google t.a.m. sakað stjórnvöld um skipulagðar tölvuárásir á leitarvél sína. Þá neitaði Google því í ársbyrjun 2010 að halda áfram að ritskoða leitarniðurstöður á kínversku leitarvélinni. Áður var fyrirvari á leitarvél Google í Kína sem sagði að leitarniðurstöður væru ef til vill ekki tæmandi vegna löggjafar í Kína.
