*

þriðjudagur, 3. ágúst 2021
Innlent 18. mars 2015 12:12

Kjarasamningur við Norðurál sá fyrsti sinnar tegundar

Launahækkanir taka mið af launavísitöluhækkunum Hagstofunnar samkvæmt nýjum kjarasamningi við Norðurál.

Ritstjórn
Aðsend mynd

Kjarasamningur milli Norðuráls á Grundartanga og starfsmanna þess var undirritaður í húsakynnum ríkissáttasemjara í gærkvöldi. Fréttastofa RÚV greinir frá þessu.

Þar kemur fram að samningurinn gildi til ársloka 2019 og nái til starfsmanna Norðuráls hjá Félagi iðn- og tæknigreina, Verkalýðsfélagi Akraness, Stéttarfélagi Vesturlands, VR og Rafiðnaðarsambandi Íslands. Samningurinn verður kynntur félagsmönnum á næstu dögum og lýkur atkvæðagreiðslu 26. mars næstkomandi.

Vilhjálmur Birgisson, formaður Verkalýðsfélags Akraness, segir í samtali við RÚV að um sé að ræða tímamótasamning. Segir hann að í fyrsta skipti, að honum vitandi, sé skrifað undir samning fyrir verkafólk og iðnaðarmenn sem byggist á því að launahækkanir taki mið af launavísitöluhækkunum Hagstofunnar.