Tilraunir með kjarnasamrunavélina Wendelstein 7-x eiga að hefjast í desember þessa árs.
Vélin var níu ár í smíðum, og verkfræðingar störfuðu við bygginguna í meira en milljón klukkustundir, að sögn fréttar frá Max Planck Institute í Þýskalandi.
Tæknilegar breytur maskínunnar hafa verið prófaðar hver á fætur annarri, og nú situr aðeins eftir að kveikja endanlega á henni og framkalla í henni helíumrafgas.
Það er þó aðeins enn ein tilraunin, en raunverulegt markmið vélarinnar er að geta framkallað kjarnasamruna í lofttegundinni vetni, sem er það sama og knýr sólina áfram.
Kveikja á lítilli sól í Þýskalandi
Markmið samrunarannsóknarinnar er að þróa kjarnavirkjun sem dregur orku úr kjarnasamruna frumeinda, rétt eins og sólin og aðrar stjörnur gera.
Samrunaeldur kviknar aðeins við hitastig yfir 100 milljón gráður á selsíus. Því þarf að gera ráðstafanir fyrir að eldsneytið, vetnisrafgas, komist ekki í snertingu við veggi vélarinnar.
Notast er við segulsvið til að halda rafgasinu svífandi í lottæmdum klefa meðan frumeindirnar renna saman og gefa af sér gífurlegt magn orku.
Mikilvæg orkulind fyrir hlýnandi hnött
Ef rétt er farið að kjarnasamruna hefur hann lítil sem engin loftslags- og umhverfisáhrif.
Hann er því ákjósanlegt svar við erfiðu spurningunni um hvernig hægt sé að svara síaukinni orkuþörf 7 milljarða manna án þess að gera endanlega út af við lífkerfi jarðar.
Eins og stendur funda leiðtogar tuga ríkja á COP21 í París þar sem ræddar eru aðferðir til að draga úr kolefnislosun víðsvegar um heiminn. Meðal þeirra sem sækja samkunduna eru Gunnar Bragi Sveinsson, utanríkisráðherra.
