Klær skuldakreppunnar meiða fjárfesta í Japan

Rauðar tölur blikkuðu við lokun hlutabréfamarkaða í Asíu í morgun. Þetta eru sömu litirnir og hafa einkennt kauphallir í Bandaríkjunum og á meginlandi Evrópu síðustu daga. Erlendir fjölmiðlar hafa eftir fjármálasérfræðingum í dag ástæðuna þá að áhrifa skuldakreppunnar á evrusvæðinu gæti nú víðar en áður. Þetta geti leitt til þess að traust þverri á ný og aðgangur að lánsfjármagni lokist smám saman.

Þá bætir ekki úr skák að Spánverjar bættust í flokk þeirra evrulanda sem þurfa að punga út meiri pening en áður fyrir hvert nýtt lán sem þeir taka. Lántökukostnaður á 10 ára spænsk ríkisskuldabréf hefur verið á miklu flugi í vikunni. Ríkisstjórnin stóð fyrir skuldabréfaútboði í gær sem fékk fremur dræmar undirtektir. Stjórnvöld urðu að greiða 6,975% álag á skuldabréf, sem er ógnarhár lántökukostnaður og nálægt sársaukamörkum. Til samanburðar var ákvöxtunarkrafa á sambærileg skuldabréf Spánverja 5,43% í síðasta útboði þeirra.

Þegar Grikkir, Írar og Portúgalar rufu 7% múrinn urðu ráðamenn landanna að leita ásjár Evrópusambandsins eftir fé úr neyðarsjóðum, bæði var það vegna þess að fjárfestar töldu stjórnvöld landanna ekki geta staðið undir skuldabagganum auk þess sem löndin réðu ekki við svo hátt álag á skuldirnar.

Nikkei-hlutabréfavísitalan í Japan lækkaði um 1,21% við lokun markaða í dag. Aðrar hlutabréfavísitölur á stórum mörkuðum í Asíu fóru niður um tæp 2%. Þetta er þriðja vikan í röð sem Nikkei-vísitalan lækkar en hún hefur fallið um 18% á árinum.