Klappað fyrir forsetanum á afmæli Samhjálpar - myndir

Samhjálp hélt upp á 40 ára afmæli á fimmtudag í síðustu viku í samkomusal félagsins í Stangarhyl. Þar var margt góðra gesta sem gæddi sér á súpu og þarnæst á köku í tilefni dagsins. Fyrir utan kaffiboð hélt félagið tónlistarveislu langt fram á kvöld.

Samhjálp var formlega stofnað 31. janúar 1973, á afmælisdegi Einars Gíslasonar sem þá var prestur í Fíladelfíu, en hann ásamt frumherjanum Georg Viðar settu þá á fót líknarfélag sem átti að styðja við bakið á þeim sem höfðu orðið undir í lífinu sökum áfengis- eða vímuefnaneyslu.

Þeir settu á fót meðferðarheimili að Hlaðgerðarkoti í Mosfellsdal og opnuðu súpueldhús og gistiskýli sem enn eru opin. Hefur starfsemin vaxið og dafnað á þeim tíma sem liðinn er frá stofnun.

Vörður Leví Traustason, prestur Fíladelfíu, ávarpar gesti.

Guðbjartur Hannesson velferðarráðherra, Ögmundur Jónasson innanríkisráðherra og Ólafur Ragnar Grímsson, forseti Íslands, mættu til veislunnar.

Séra Hjálmar Jónsson dómkirkjuprestur og Hreinn Sk. Hákonarson fangaprestur.

Guðni Páll Viktorsson kajakræðari ávarpar gesti.

Einar K. Guðfinnsson þingmaður og Björk Vilhelmsdóttir borgarfulltrúi.

Mike og Sheila Fitzgerald, eigendur útvarpsstöðvarinnar Lindin.