Kolbrún Dröfn Ragnarsdóttir hefur gengið til liðs við Billboard/Buzz sem sölustjóri og hóf hún störf 1. október síðastliðinn.

Kolbrún kemur við hlið Jóns Ásgeirs Gestssonar sem hefur verið sölustjóri undanfarin tvö ár í breyttu skipulagi þar sem nú verða tvær söludeildir innan miðla Billboard/Buzz.

Áður hafði Kolbrún verið sölustjóri hjá DV fyrir sameiningu við Torg og þar áður í 13 ár hjá auglýsingamiðlum tengdum Morgunblaðinu. Einnig hefur hún unnið við leiðsögn og rak saumastofu samhliða námi.

Kolbrún er með MBA gráðu frá Háskóla Íslands, stundaði viðskiptafræði við Háskólann í Reykjavík og lauk námi við leiðsöguskóla MK. Kolbrún er í sambúð með Hannesi A. Hannessyni og er móðir Birnu Rósar og Ýmis Arnars og á fjögur stjúpbörn, Hákon, Vilhjálm, Mikael og Hörpu. Hundurinn Dimma býr á heimilinu líka.

Billboard og Buzz standa að úti- og umhverfismiðlun ýmis konar, sem eiga að gera fyrirtækjum kleift að að ná til höfuðborgarbúa með áhrifaríkum hætti og þannig stýrt orðinu á götunni. Fyrir útbreiðslu kórónuveirufaraldursins fóru 98% höfuðborgarbúa út í umferðina á hverjum einasta degi.

Hjá Billboard eru 18 stórir LED skjáir þar sem áður voru flettiskilti og 12 skjáir á teikniborðinu fyrir næsta ár. Hjá Buzz er búið að setja upp 250 LED skjái í biðskýli strætisvagna í Reykjavík, Hafnarfirði og Mosfellsbæ og verið að undirbúa uppsetningar í Garðabæ.

Félögin eru einnig með klassíkt plakata skýli sem eru með 350 auglýsingaflötum í öllum bæjarfélögum höfuðborgarsvæðisins og 15 flettiskilti á suðvesturhorninu. Kolbrún segist sjá mikil tækifæri í útimiðlum Billboard / Buzz.

„Útimiðlar taka við af prenti sem sá miðill sem hefur mestu þyngd í dekkun innan dagsins á íslenskum auglýsingamarkaði. Uppbygging vörumerkjavitundar er nauðsynlegur hluti markaðsstarfs hvers fyrirtækis og með minnkandi blaðalestri eru útimiðlar orðnir enn mikilvægari þáttur í þessari uppbyggingu,“ segir Kolbrún sem segir útimiðla bjóða upp á möguleika sem ekki sé hægt að ná fram í öðrum miðlum.

„Hægt er að sníða auglýsingarnar að mismunandi hverfum og markhópum og vera með margvísleg skilaboði innan dags. Útimiðlar hafa alltaf verið mikilvægir í markaðsstarfi stórra vörumerkja erlendis og eru núna orðnir raunverulegur valkostur fyrir íslensk fyrirtæki.“