*

þriðjudagur, 12. nóvember 2019
Innlent 30. maí 2019 16:07

Kolefnisjöfnun fyrir 7 krónur á lítra

Viðskiptavinum Orkunnar býðst að fórna afslætti orkulykilsins til að kolefnisjafna eldsneytiskaup sín,

Ritstjórn
Orkan rekur m.a. bensínstöðvar við Miklabraut, en í húsnæðinu á bakvið þessa tilteknu er veitingastaðurinn Dirty burgers and ribs til húsa.

Frá og með deginum í dag geta viðskiptavinir Orkunnar nýtt Orkulykilinn sinn til að kolefnisjafna eldsneytiskaup og þannig lagt sitt af mörkum til að minnka kolefnisfótspor og stuðla að bættri umhverfismenningu.

Þeir geta hins vegar líka valið að njóta afsláttarins í sínum eldsneytiskaupum, en þetta er í fyrsta sinn sem hægt er að kolefnisjafna eldsneytiskaup hér á landi. Fyrir utan afsláttinn kostar viðskiptavini Orkunnar ekkert aukalega að leggja málefninu lið.

„Þetta virkar á þann hátt að viðskiptavinir geta farið inn á heimasíðu Orkunnar og breytt lyklinum eða kortinu sínu svo þeir geti kolefnisjafnað eldsneytiskaupin,“ segir Ingunn Agnes Kro, framkvæmdastjóri samskiptasviðs Orkunnar og Skeljungs, sem segir átakið hluta af samstarfi félagsins við Votlendissjóð við að kolefnisjafna reksturinn að fullu til næstu þriggja ára.

„Eftir breytinguna verður það þá þannig að 7 króna afslætti af hverjum lítra sem viðskiptavinurinn dælir verður ráðstafað til Votlendissjóðs. Sé viðskiptavinur með meiri afslátt en þessar 7 krónur fær hann mismuninn að sjálfsögðu í sinn vasa. Framlagi viðskiptavina er skilað til Votlendissjóðs en þeir fjármunir sem safnast verða nýttir til endurheimtar votlendis

Ein skilvirkasta leiðin til að stöðva losun gróðurhúsalofttegunda er sögð vera endurheimt votlendis en 66% af þekktri losun á Íslandi er frá framræstu votlendi.

„Það er mikilvægt að stöðva alla losun sem hægt er strax. Orkuskiptin í samgöngum eru að eiga sér stað en það mun eðlilega taka sinn tíma fyrir almenning að skipta út bílum og eins tekur uppbygging í almenningssamgöngum tíma og kostar töluverða fjármuni. Einhvers staðar verður að byrja og við hjá Orkunni erum komin á fulla ferð áfram til að gera okkar fyrir umhverfið“.