Konum í stjórnum fyrirtækja hefur fjölgað töluvert milli ára ef marka má könnun KPMG meðal stjórnarmanna í íslenskum félögum og sjóðum.
Send var beiðni til þátttöku í könnuninni til 920 stjórnarmanna í 265 félögum og 31 lífeyrissjóði og voru karlar 71% og konur 29% þeirra sem fengu beiðni. Í fyrra fengu 814 stjórnarmenn í 232 félögum og 32 lífeyrissjóðum beiðni um þátttöku og voru karlar 79% og konur 21%. Fjölgun kvenkyns stjórnarmanna er því umtalsverð þrátt fyrir að konur séu ekki 40% stjórnarmanna, en lög um 40% lágmarkshlutfall hvors kyns í stjórnum taka gildi þann 1. september á næsta ári.
Þessi fjölgun kvenna í stjórnum á Íslandi birtist meðal annars í því að af þeim stjórnarmönnum sem setið hafa í stjórn skemur en í eitt ár eru konur 51%, en af þeim sem hafa setið í stjórn í sjö ár eða lengur eru karlar 86%. Þróunin er því augljóslega í þá átt að konum fjölgi í stjórnum félaga og sjóða.
