Kópavogsbær greiddi í fyrra upp skuldabréf sem bærinn gaf út árið 1999 í tengslum við eignarnám 90,5 hektara lands á Vatnsenda. Þá var samið um að greiða dánarbúi Magnúsar Hjaltested, föður Þorsteins Hjaltested, 237 milljónir króna í formi verðtryggðs skuldabréfs.
Að sögn Örnu Schram, upplýsingafulltrúa Kópavogsbæjar, var bréfið greitt upp í fyrra vegna óhagstæðra vaxtakjara en það bar 6% ársvexti. Skuldabréfið var upphaflega til innheimtu hjá Búnaðarbankanum og er Kópavogsbæ ekki kunnugt um hver hafi tekið á móti greiðslunum.
Fram kom í dómi Hæstaréttar í síðustu viku, þar sem niðurstaðan var sú að eignarhald á Vatnsenda tilheyrði dánarbúi Sigurðar Hjaltested, afa Þorsteins, að eftir andlát Magnúsar Hjaltested árið 1999 hefði jörðinni verið þinglýst á Kristrúnu Ólöfu Jónsdóttur, ekkju Magnúsar. Um ári síðar var jörðinni síðan þinglýst á Þorstein og gera má ráð fyrir að hann hafi tekið á móti greiðslum í samræmi við eignarnámssáttina við Kópavogsbæ.
Ítarlega er fjallað um Vatnsendamálið í Viðskiptablaðinu. Áskrifendur geta nálgast blaðið hér að ofan undir liðnum tölublöð.
