Fasteignafélagið Korputorg ehf., sem leigir út fasteignina að Blikastaðaveg 2-8, hagnaðist um 4,2 milljarða króna á síðasta ári borið saman við 62,9 milljónir árið áður. Korputorg er í eigu Guðbjargar Matthíasdóttur í gegnum félagið Kristinn ehf. Guðbjörg er jafnframt einn af eigendum Árvakurs og stærsti eigandi Ísfélags Vestmannaeyja.

Hreinar leigutekjur Korputorgs ehf. námu 352,5 milljónum og var rekstrarhagnaður fyrir matsbreytingu fjárfestingareigna og afskriftir 299,3 milljónir borið saman við 309,2 milljónir árið áður. Eftir matsbreytingu nam rekstrarhagnaðurinn 5,5 milljörðum króna. Eignir félagsins voru bókfærðar á 8,5 milljarða í lok árs 2016 borið saman við 3,4 milljarða árið áður. Eigið fé nam 4,4 milljörðum en var 188,9 milljónir árið 2015.