Kortaþjónustan hefur sagt upp yfir tug starfsmanna, samkvæmt frétt Fréttablaðsins . Fjöldinn samsvarar um fimmtungi starfsmanna fyrirtækisins, en framkvæmdastjóri félagsins hefur ekki viljað staðfesta uppsagnirnar.
Björgvin Skúli Sigurðsson, framkvæmdastjóri Kortaþjónustunnar, segir fyrirtækið hafa ákveðið að „rifa seglin í útrásinni en einbeita okkur aftur að greiðsluþjónustu fyrir íslensk fyrirtæki.“
Kortaþjónustan er í eigu Kviku banka auk hóps annarra fjárfesta, meðal annars stórra hluthafa í Kviku og VÍS. Í fyrra lenti fyrirtækið í miklum vandræðum vegna falls breska flugfélagsins Monarch.
Kortaþjónustan hafði séð um færsluhirðingu fyrir flugfélagið og sat uppi með mikið fjárhagslegt tjón vegna ábyrgða á greiðslum fyrir flugferðir sem aldrei varð af.