Kosningar eru hafnar í Bandaríkjunum. Úrslit kosninganna geta haft mikil áhrif á hversu auðveldlega Obama forseti getur komið stefnumálum sínum í gegnum þingið.
Nær öruggt er talið að demókratar missi meirihluta sinn í fulltrúadeildinni. Meirihluti þeirra hefur verið tryggur síðustu tvö árin og er nú 255 sæti á móti 178 sætum repúblíkana. Kannanir sýna að repúblíkanar gætu unnið í kringum 60 sæti og því náð öruggum meirihluta.
Í öldungadeildinni er hins vegar talið nær víst að demókratar haldi meirihluta. Helgast það af því að aðeins er kosið um 37 sæti 100. Í dag hafa demókratar 59 sæti en repúblíkanar 41. Kannanir gera ráð fyrri því að repúbíkanar vinni allt að 8 sæti af demókrötum.
