Árið 2013 nam kostnaður ríkissjóðs vegna allra ferða erlendis um 900 milljónum króna. Inni í þeirri upphæð er kostnaður við flug til og frá landinu, tengiflug erlendis, auk allra ferða með lestum, rútum, skipum og ferjum. Kemur þetta fram í frétt á vefsíðu fjármálaráðuneytisins.

Ferðakostnaður er bókfærður á þann sem ferðast hverju sinni á vegum ríkisins, ekki á þau félög sem ferðast er með. Því er ekki greinanlegt í bókhaldi Fjársýslu ríkisins hver viðskipti við einstök félög eru árlega. Samkvæmt upplýsingum sem fjármála- og efnahagsráðuneytið fékk frá Icelandair námu viðskipti stofnana ríkisins við félagið um 300 milljónum króna árið 2013.

Íslensk stjórnvöld eiga í margháttuðum erlendum samskiptum og því stendur ríkið straum af kostnaði við ferðir til og frá landinu. Ríkissjóður greiðir að auki ferðakostnað annarra í öðrum tilvikum, t.a.m. þegar íslenskir borgarar þurfa að leita læknisaðstoðar erlendis, að því er segir í fréttinni.