Bleika slaufan, söfnunar- og árvekniátak Krabbameinsfélags Íslands (KÍ), hefst formlega á morgun 1. október. Hefur félagið sett sér það markmið að selja 45 þúsund slaufur fram til 15. október þegar slaufusölunni lýkur. Þetta er jafnframt í tíunda sinn sem bleika slaufan er seld hérlendis.
Allur ágóði af sölu bleiku slaufunnar fer að þessu sinni til leitarstarfs KÍ. Slaufan í ár er hönnuð af Sif Jakobs, sem hlotið hefur alþjóðlega viðurkenningu fyrir skartgripahönnun sína, og veitti Jóhanna Sigurðardóttir forsætisráðherra fyrstu slaufunni viðtöku í dag.
Tíu ár eru frá því að árveknisátaki um brjóstakrabbamein var hleypt af stokkunum hérlendis með sölu á bleiku slaufunni og hefur það vaxið og dafnað með hverju árinu sem líður.
„Sala á bleiku slaufunni gekk einstaklega vel í fyrra þrátt fyrir efnahagshrunið. Þá seldum við ríflega 40 þúsund slaufur sem gerði okkur kleift að ljúka greiðslu á nýjum, stafrænum leitarbúnaði fyrir Leitarstöðina og færa alla skráningu yfir á rafrænt form. Í ár ætlum við að gera enn betur og selja 45.000 slaufur og nú rennur allur ágóði af sölu bleiku slaufunnar beint til leitarstarfsins,“ segir Guðrún Agnarsdóttir, forstjóri Krabbameinsfélags Íslands.