Sigurður Hannesson framkvæmdastjóri Samtaka iðnaðarins segir ummæli Dags B. Eggertssonar, sem kenndi skorti á krönum um seinagang í uppbyggingu húsnæðis í borginni, vera af og frá og ekki standast skoðun. að því er Morgunblaðið segir frá.
Hafði Dagur haldið því fram í kvöldfréttum RÚV að ef ekki væri fyrir skort á krönum og öðru væri hægt að tvöfalda kraftinn í uppbyggingunni. „Í samtölum okkar við verktaka kemur í ljós að þau ummæli borgarstjóra að það vanti krana og mannskap til að byggja meira standast ekki skoðun,“ segir Sigurður.
Dagur B. Eggertsson borgarstjóri í meirihluta Samfylkingar, Vinstri grænna, Bjartrar framtíðar og Pírata í borginni vísaði í ummælum sínum einnig á skort á starfsfólki.
„Áhyggjur okkar lúta meira að því að það sé ekki nógu mikið af stórum og öflugum verktökum til að takast á við öll þessi verkefni,“ sagði Dagur en eins og Viðskiptablaðið hefur greint frá þakkar hann því að öfluga verktaka þurfi til að vinna á þéttingarreitum að uppbygging þar gengur hraðar en í úthverfum.
Umtalsverð aukning eftirspurnar eftir lægri krönum fyrir nýbyggingar utan höfuborgarsvæðisins
Stjórnendur fyrirtækja sem bæði leigja út og selja byggingarkrana taka ekki undir með borgarstjóra um að skortur á krönum sé takmarkandi þáttur heldur þvert á móti sé það skortur á lóðum, sérstaklega á nýbyggingarsvæðum.
„Kranar eru ekki flöskuhálsinn, það er alveg ljóst,“ sagði einn stjórnendanna sem segir fyrirtækin fylgjast með þróun markaðarins í því hversu margir kranar komi til landsins. Segir einn stjórnendanna að lítil eftirspurn sé eftir stóru krönunum sem þurfi til í þéttingarreitina og framboðið svalaði alveg eftirspurninni eftir þeim.
„Þessi stóru verkefni eru tiltölulega nýtilkomin,“ segir hann og bendir á að umtalsverð aukning hefði verið á hefðbundnum byggingarkrönum úti á landi, sérstaklega á Suðurlandi, en ekki væri að merkja mikla aukningu á höfuðborgarsvæðinu. „Markaðurinn hér hefur snúist um að byggja lægri hús.“
Einn stjórnendanna benti á að kranar væru fluttir inn eftir þörf en ekki til að eiga á lager til skemmtunar. „Þetta eru dýr tæki," segir hann. „Það er nóg til af byggingarkrönum og ef það vantar krana er enginn vandi að fá fleiri. Það sem vantar er nóg af lóðum til að byggja og helst á nýbyggingarsvæðum.“