*

fimmtudagur, 17. október 2019
Fólk 10. október 2019 13:51

Kristín Hrefna ráðin framkvæmdastjóri Flow

Hugleiðsluhugbúnaðarfyrirtækið Flow ehf. hefur ráðið Kristínu Hrefnu Halldórsdóttur í stöðu framkvæmdastjóra félagsins.

Ritstjórn
Kristín Hrefna Halldórsdóttir er nýr framkvæmdastjóri Fow ehf..
Aðsend mynd

Stjórn Flow samþykkti fyrr í vikunni að gera Kristínu Hrefnu Halldórsdóttur að framkvæmdastjóra fyrirtækisins. Kristín Hrefna gekk til liðs við Flow í nýliðnum ágústmánuði og hefur hingað til leitt viðskiptaþróun fyrirtækisins. 

Á dögunum var viðtal við Kristínu Hrefnu í Viðskiptablaðinu sem lesa má hér.   

Kristín Hrefna vann í 5 ár í viðskiptaþróunarteymi Meniga, var sérfræðingur í viðskiptagreiningu hjá Valitor og áður framkvæmdastjóri borgarstjórnarflokks Sjálfstæðisflokksins. Hún er með MBA frá Háskóla Íslands og BA í stjórnmálafræði frá sama skóla. 

„Það eru ótrúlega spennandi tímar framundan hjá Flow. Við erum með frábærar vörur sem eru að hjálpa fyrirtækjum um allt land að byggja upp jákvæða vinnustaðamenningu sem dregur fram öllum þau jákvæðu áhrif sem nútíma hugleiðsluaðferðir geta veitt manni,“ segir Kristín Hrefna.

Flow framleiðir hugleiðsluhugbúnað fyrir sýndarveruleika og snjallsíma. Fjölmörg íslensk fyrirtæki hafa nú þegar gerst áskrifendur af fyrirtækjaþjónustu Flow sem býður aðgang að nútíma hugleiðsluaðferðum í gegnum hátækni sýndarveruleikans og hugleiðsluvinnustofur. Félagið var stofnað árið 2016 og vann Gulleggið, frumkvöðlakeppni Icelandic Startups árið 2018. Fyrr á árinu lauk félagið 118 þúsund evra fjármögnun í gegnum fjárfestingarvettvanginn Funderbeam og hefur jafnframt fengið tvo styrki frá Tækniþróunarsjóði upp á samtals 60 milljónir króna.

„Nú tekur við spennandi tími hjá mér við að semja um fjármögnun fyrir næstu skref Flow sem eru að stækka út fyrir landsteinana. Á undanförnum árum hafa margir fjárfestingarsjóðir lagt mikið fé í fjárfestingu í hugleiðslu hugbúnaði sem Flow er nú tilbúið að keppa við á erlendri grundu. Fólk er að glíma við streitu út um allan heim og við erum með einstaka lausn á þeim vanda.

Varan okkar byggir á stórkostlegu myndefni úr íslenskri náttúru sem tekið er af verðlauna kvikmyndagerðarmönnunum, Arni & Kinski, en þeir gerðu meðal annars myndbönd fyrir Sigur Rós og Snow patrol. Þeir búa til listaverk úr hverri hugleiðslu þegar þeir tvinna saman myndefnið, tónlistina og leiða njótendur inn í annan heim með þaulreyndum hugleiðslukennurum. Þetta er okkar leið til þess að fólk njóti þeirra eftirsóttu áhrifa sem hugleiðsla getur dregið fram á aðeins 4 mínútum,“ segir Kristín Hrefna.

Tristan Elizabeth Gribbin stofnandi Flow mun áfram leiða hugleiðsluþróun fyrirtækisins sem framkvæmdastjóri hugleiðsluþróunar og tekur sæti sem stjórnarformaður. „Við gætum ekki fengið betri leiðtoga til þess að leiða fyrirtækið inn í næsta fasa en Kristínu Hrefnu. Hún hefur komið inn með þvílíkan kraft, mikla reynslu og gott innsæi til þess að byggja fyrirtækið upp sem alþjóðlegt hugleiðsluhugbúnaðar framleiðslu fyrirtæki,“ segir Tristan sem hefur verið framkvæmdastjóri fram að þessu.

Bala Kamallakharan, fráfarandi stjórnaformaður Flow og framkvæmdastjóri hjá Icelandic venture studio, er einn af aðal fjárfestum Flow. „Ég er einstaklega ánægður með að hafa fengið Kristínu Hrefnu til þess að leiða fyrirtæki inn í næstu fjármögnun félagsins. Flow hefur byggt vöru sem hefur einstaka möguleika á því að njóta gríðarlegrar velgengni alþjóðlega. Einstaklingar úr um allan heim eru að glíma við það vandamál sem Flow leysir á stórkostlegan hátt. Streita kostar nútíma samfélag allt of mikið og þeir sem vilja vera hluta af lausninni á þeim vanda ættu að hugleiða með Flow og fjárfesta í félaginu sem er á gríðarlegri siglingu með Kristínu Hrefnu við stjórnvölinn,“ segir Bala.