Kristín Haraldsdóttir er nýr lögfræðilegur aðstoðarmaður Ólafar Nordal innanríkisráðherra. Kristín er sérfræðingur við lagadeild Háskólans í Reykjavík. Hún hóf störf í ráðuneytinu í dag.
„Kristín Haraldsdóttir lauk lögfræðiprófi frá lagadeild Háskóla Íslands árið 1995 og meistaragráðu í Evrópurétti frá Háskólanum í Lundi 1997. Hún starfaði um skeið á lögmannsstofu Svölu Thorlacius og Gylfa Thorlacius, var um sex ára skeið lögfræðingur í sjávarútvegsráðuneytinu og iðnaðar- og viðskiptaráðuneytinu og árin 2003 til 2008 var hún lögfræðilegur aðstoðarmaður dómara við EFTA-dómstólinn í Lúxemborg. Frá árinu 2009 hefur Kristín verið sérfræðingur við lagadeild Háskólans í Reykjavík og forstöðumaður Auðlindaréttarstofnunar lagadeildar Háskólans í Reykjavík. Þá hefur Kristín átt sæti í ýmsum stjórnum og nefndum, meðal annars verið formaður kærunefndar lausafjár- og þjónustukaupa, setið í stjórn Sjóvá-Almennra trygginga hf. og verið formaður stjórnar Samkeppniseftirlitsins,“ segir í tilkynningu frá ráðuneytinu.
