Kristján Þór Júlíusson, þingmaður Sjálfstæðisflokksins fékk nokkuð afgerandi kosningu í fyrsta sæti í prófkjöri flokksins í Norðausturkjördæmi um helgina.
Kristján Þór fékk alls 1.477 atkvæði í fyrsta sæti listans eða rúm 72% greiddra atkvæða en 2.041 tóku þátt í prófkjörinu.
Þá hlaut Tryggvi Þór Herbertsson kosningu í annað sæti listans og kemur því nýr inn á lista. Arnbjörg Sveinsdóttir, þingflokksformaður flokksins hlaut kosningu í þriðja sæti og fellur því niður um eitt sæti frá síðustu kosningum.
Sjálfstæðisflokkurinn hefur nú þrjá þingmenn í þessu kjördæmi en Ólöf Nordal, sem nú situr á þingi fyrir Norðausturkjördæmi býður sig nú fram í Reykjavík.
Röð sex efstu frambjóðendanna er sem hér segir:
- Kristján Þór Júlíusson
- Tryggvi Þór Herbertsson
- Arnbjörg Sveinsdóttir
- Björn Ingimarsson
- Soffía Lárusdóttir
- Anna Guðný Guðmundsdóttir