Kristrún Heimisdóttir hefur verið ráðin aðstoðarmaður Árna Páls Árnasonar, efnahags- og viðskiptaráðherra.
Frá þessu er greint á vef efnahags- og viðskiptaráðuneytisins.
Kristrún er lögfræðingur að mennt og hefur starfað sem slíkur hjá LEX lögmannsstofu, Samtökum iðnaðarins, félags- og tryggingamálaráðuneytinu og umboðsmanni Alþingis.
Hún var framkvæmdastjóri Reykjavíkur Akademíunnar og hefur kennt lögfræði og heimspeki við Háskólana í Reykjavík, á Akureyri og á Bifröst. Hún var aðstoðarmaður Ingibjargar Sólrúnar Gísladóttur, utanríkisráðherra 2007-2009.
Hún var fulltrúi Íslands í Stoltenberg-nefndinni um öryggis- og varnarmál Norðurlanda 2008-2009, sat í nefnd um endurskoðun stjórnarskrárinnar 2005-2007 og var varamaður í Seðlabankaráði 2003-2007 og varaþingmaður 2003-2009.
Kristrún hefur ritað fræðigreinar og haldið fjölda fyrirlestra á sviði lögfræði, réttarheimspeki og alþjóðamála.
