*

miðvikudagur, 27. október 2021
Fólk 1. mars 2017 08:35

Kristrún nýr hagfræðingur Viðskiptaráðs

Kristrún Frostadóttir hefur verið ráðin hagfræðingur Viðskiptaráðs Íslands og tekur við Birni Brynjúlfi Björnssyni.

Ritstjórn
Aðsend mynd

Kristrún Frostadóttir hefur verið ráðin hagfræðingur Viðskiptaráðs Íslands. Kristrún tekur við starfinu af Birni Brynjúlfi Björnssyni sem hefur starfað sem hagfræðingur ráðsins síðastliðin þrjú ár. Kristrún mun hefja störf i lok mars. Þetta kemur fram í fréttatilkynningu frá Viðskiptaráði Íslands.

„Kristrún kemur til Viðskiptaráðs frá bandaríska fjárfestingarbankanum Morgan Stanley. Þar hefur hún starfað sem sérfræðingur i greiningardeild, fyrst í New York og síðan í London. Sérsvið Kristrúnar í London sneri að greiningu á evrópskum netverslunarfyrirtækjum. Í New York sinnti hún greiningarvinnu í tengslum við bandarísk eignastýringar- og orkufyrirtæki.
Áður hefur Kristrún starfað meðal annars sem blaðamaður á Viðskiptablaðinu og sem hagfræðingur í starfshóp á vegum forsætisráðuneytisins. Auk þess starfaði hún sem hagfræðingur í greiningardeild Arion banka árin 2011-2012,“ segir í fréttinni.

Kristrún er með meistaragráðu í alþjóðafræðum frá Yale-háskóla, með áherslu á hagstjórn og alþjóðafjármál, sem og meistaragráðu í hagfræði frá Boston-háskóla. Einnig er Kristrún með BS-próf í hagfræði frá Háskóla Íslands.