Héraðsdómur Reykjavíkur hafnaði rétt í þessu kröfu Baldurs Guðlaugssonar, fyrrum ráðuneytisstjóra í fjármálaráðuneytinu, um að rannsókn sérstaks saksóknara á hendur honum verði felld niður.

Lögmenn Baldurs hyggjast kæra höfnunina til Hæstaréttar.

Embætti sérstaks saksóknara hefur rannsakað hvort að Baldur hafi búið yfir innherjaupplýsingum þegar hann seldi hlutabréf sín í Landsbankanum fyrir alls 192 milljónir króna skömmu áður en að bankarnir hrundu.

Baldur vildi að rannsókninni yrði vísað frá á grundvelli þess að Fjármálaeftirlitið (FME) hefði þegar tilgreint honum að það hefði þegar lokið henni með bréfi dagsett 7. maí 2009. Hann vill meina að því hafi verið óheimilt að opna hana á ný líkt og það ákvað á fundi sínum 19. júní 2009 eftir að ábendingar bárust um nýjar upplýsingar í málinu. Þessum rökum hefur héraðsdómur hafnað.

Nýju gögnin sem enduropnun málsins byggði á, og skýrslutökur hjá sérstökum saksóknara hafa m.a. tekið mið af, voru fundargerðir samráðshóps um fjármálastöðugleika frá janúar til ágúst í fyrra. Í hópnum sátu fulltrúar forsætis-, fjármála-, og viðskiptaráðuneytis, auk fulltrúa Fjármálaeftirlitsins og Seðlabanka Íslands. Baldur var í hópnum sem fulltrúi fjármálaráðuneytisins.

Viðskiptablaðið greindi ítarlega frá málflutningi

Í Viðskiptablaðinu þann 17. desember síðastliðinn var greint ítarlega frá málflutningi í málinu. Þar var meðal annars sagt frá  skýrslutöku yfir Jónínu S. Lárusdóttur, ráðuneytisstjóra í efnahags- og viðskiptaráðuneytinu, sem Björn Þorláksson, sem flutti málið fyrir hönd sérstaks saksóknara, vitnaði til í málflutningi.

Þar sagði hún að Baldur hefði setið fund með sér ásamt bankastjórum Landsbankans, Sigurjóni Árnasyni og Halldóri J. Kristjánssyni, 13. ágúst í fyrra. Á fundinum lýstu þeir, „í algjörum trúnaði", eins og Björn komst að orði, því yfir að Landsbankinn gæti lent í vandræðum þar sem bankinn gæti ekki orðið við kröfum breska fjármálaeftirlitsins um færslu á Icesave-reikningum Landsbankans yfir í breskt dótturfélag.

Björn sagði síðan: „Þetta sýnir að Baldur sagði ósatt um að hann hefði aldrei átt samskipti við stjórnendur Landsbankans, og þá sýnir þetta einnig að hann bjó yfir upplýsingum um stöðu Landsbankans sem sýndi alvarlega stöðu hans á þessum tíma."

Gæti orðið banabiti bankanna ef upplýsingar um stöðu þeirra yrði almennar

Þá vitnaði Björn einnig til þess að Baldur hefði setið fund í Seðlabankanum 31. júlí, þar sem staða íslensku bankanna var til umræðu. Björn vitnaði sérstaklega til þess að Jónas Fr. Jónsson, þáverandi forstjóri Fjármálaeftirlitsins, hefði látið bóka að Landsbankinn hefði þrjá mánuði til þess að uppfylla skilyrði breska fjármálaeftirlitsins vegna Icesave.

Þá hefði Tryggvi Pálsson, framkvæmdastjóri fjármálasviðs Seðlabankans, látið bóka að breska fjármálaeftirlitið væri að vinna góða vinnu við að lágmarka tjón tryggingasjóðsins íslenska. Baldur sjálfur lét síðan bóka sérstaklega, að það gæti orðið „banabiti bankanna" ef upplýsingar um stöðu þeirra, sem var til umfjöllunar á fundinum, yrðu á allra vitorði.

„Banabiti," ítrekaði Björn.

Hefði viljað fá upplýsingar áður en að viðskiptin áttu sér stað

Bolli Þór Bollason, sem var ráðuneytisstjóri í forsætisráðuneyti Geirs H. Haarde, var formaður fyrrnefnds samráðshóps. Hann hefur verið yfirheyrður af sérstökum saksóknara vegna málsins og vitnaði Björn til skýrslu sem hann gaf í málflutningi sínum. Baldur hafði í bréfi nefnt að hann hefði hringt í Bolla Þór degi áður en hann seldi hlutabréfin og tilkynnt honum um að hann ætlaði að selja bréf sín. Þetta hefði hann gert þar sem Bolli Þór var formaður hópsins.

Björn sagði Bolla Þór hafa neitað þessu við skýrslutöku og sagt Baldur hafa hringt í sig eftir að hann seldi bréfin.

„Bolli Þór svaraði því til að þetta hefði verið óheppilegt, hann hefði viljað fá upplýsingar um þetta áður en viðskiptin áttu sér stað," sagði Björn.