Eigandi byggingarfélagsins Eyktar hefur misst Höfðatorg ehf. til lánardrottna en félagið á Höfðatorgsbygginguna og óbyggðar lóðir þar í kring og skuldaði 23 milljarða króna um síðustu áramót. Þetta kemur fram í Fréttablaðinu í dag en þar segir að félagið sé komið í nauðasamningaferli og að lánardrottnar muni greiða atkvæði um samningana 22. desember en Íslandsbanki sé þeirra langstærstur.
Fram kemur í Fréttablaðinu að fyrsti áfangi Höfðatorgs hafi verið tekinn í notkun í byrjun árs 2008 og það hýsi í dag fyrst og fremst ýmsa starfsemi á vegum Reykjavíkurborgar, sem leigt hafi húsnæðið af Höfðatorgi ehf. Um þrjátíu prósent af tuttugu þúsund fermetra húsnæði Höfðatorgs standi nú tóm.
