Kvika banki kaupir sjálft helming nýs skuldabréfs Upphafs fasteignafélags en stefnt er að því að gefa út milljarðs skuldabréf jafnvel strax í dag að því er Fréttablaðið greinir frá.

Eins og Viðskiptablaðið hefur fjallað ítarlega um hafa skuldabréfaeigendur fyrirtækisins, sem er í eigu sjóðsins Gamma: Novus, samþykkt skilmálabreytingar á bréfunum sem til að mynda lengja í bréfunum og lækka vextina um ríflega helming, en vextirnir voru á bilinu 15-16,5% áður.

Þurfti þess við eftir að kom í ljós að verkefni voru komin skemmra á veg og höfðu verið dýrari en ætlunin var, en félagið skuldaði 1,1 milljarð á síðasta ári.

Þá hefur náðst samkomulag við helstu skuldabréfaeigendur Upphafs, um að leggja til hina 500 milljónirnar, en meðal stærstu eigenda bréfa félagsins er fjárfestingarfélagið Stoðir, TM og félag í eigu Guðbjargar Matthíasdóttur aðaleigenda Ísfélagsins í Vestmannaeyjum.

Bæði TM og Sjóvá gáfu út afkomuviðvörun vegna félagsins á sínum tíma og sagði Sigurður Viðarsson forstjóri TM það „með ólíkindum að menn hafi klúðrað þessu“. Nýja skuldabréfið mun bera 12% vexti, ekki 6% eins og gömlu bera nú eftir breytingar, sem og þau verða framar í kröfuröðinni.

Í síðustu viku bárust sjóðsfélögum í Novus þær fréttir að við endurmat eigna sjóðsins væri eigið fé þess orðnar 42 milljónir króna, en þremur mánuðum áður hafði það verið metið á 3,9 milljarða. Lækkaði samhliða gengi sjóðsins sem fór hæst í 250 í árslok 2017 niður í 2, en það bráðabirgðagengi miðast við að takist að bjarga félaginu með viðbótarfjármagni.

Nú er félagið með um 280 íbúðir í framkvæmdum en áætluð verklok eru nú áætluð í lok næsta árs, ef viðbótarfjármagn fæst.

Hér má lesa frekari fréttir um málefni fjárfestingarsjóða Gamma, það er Anglia, Novus og Upphafs: