Viðskipti með aflaheimildir hafa meira og minna legið niðri síðastliðna níu mánuði og bendir fátt til þess að líf sé að færast í markaðinn að nýju. Eins og á öðrum eignamörkuðum má fyrst og fremst rekja frostið á kvótamarkaðnum til lánsfjárkreppunnar og hratt hækkandi fjármagnskostnaðar, en fleira kemur þó til en dýrari peningar og skert aðgengi að lánsfé.
Olíuverð hefur hækkað gríðarlega á undanförnum árum en olíukostnaður er stór kostnaðarliður í rekstri útgerðarfyrirtækja. Árið 2004 kostaði tunna af skipaolíu í kringum 350 dollara en í dag er hún verðlögð á 1.230 dollara og hefur verðið því nær fjórfaldast á tímabilinu.
Þessi hækkun tekur til sín æ stærri hluta af tekjum greinarinnar; fyrir fjórum árum nam olíukostnaður að jafnaði 8% af tekjum útgerðarinnar en nú er þetta hlutfall komið upp í 20%. Svo mikil kostnaðarhækkun kemur sömuleiðis hart niður á væntingum um framtíðarafkomu greinarinnar, sem svo aftur verður til þess að kaupendur á kvótamarkaði halda að sér höndum.
Afurðaverð erlendis hefur verið einstaklega gott undanfarin misseri og vegið þungt á móti niðurskurði þorskaflaheimilda. Síðustu vikur hefur hins vegar hægt á hækkunum og stendur verðið nú í stað.
Samkvæmt heimildum Viðskiptablaðsins ríkir mikil óvissa um verðþróunina á mörkuðum erlendis og slík óvissa er til þess fallin að valda enn frekari þrýstingi á kvótaverðið til lækkunar.
_______________________________________
Nánar er fjallað um málið í Viðskiptablaðinu í dag. Áskrifendur geta lesið blaðið á pdf-formi hér á vefnum. Þeir áskrifendur sem ekki hafa sótt um aðgangsorð til að lesa blaðið á vefnum geta gert það hér .
