Kynbundinn launamunur á heildarlaunum mælist nú 16,3% á vinnumarkaðnum í heild, samkvæmt nýrri rannsókn Félagsvísindastofnunar Háskóla Íslands á launum karla og kvenna.
Launamunurinn er, samkvæmt könnuninni, meiri meðal fólks sem starfar á almennum vinnumarkaði og enn meiri á landsbyggðinni en á höfuðborgarsvæðinu.
Umtalsverður launamunur meðal framhaldsskólamenntaðra
„Hjá hinu opinbera, þ.e. ríki og sveitarfélögum, mælist ekki marktækur kynbundinn launamunur meðal starfsmanna með grunnskólamenntun og með háskólamenntun, en hjá þeim sem falla í flokkinn framhaldsskólamenntaðir mælist hann umtalsverður," segir á vef félags- og tryggingamálaráðuneytisins um könnunina.
Þar segir að könnunin sé sú fyrsta sem endurspegli vinnumarkaðinn í heild sinni. Ráðuneytið fól Félagsvísindastofnun að gera könnunina.