Finnur Oddsson, forstjóri Haga og Davíð Harðarson stjórnarformaður, segja síðastliðið rekstrarár hafi verið árangursríkt en sérstaklega krefjandi, í sameiginlega ávarpi sínu í ársskýrslu fyrirtækisins.
Framlegð dagvöruverslana var undir þrýstingi allt síðasta ár vegna veikara gengis, verðhækkana frá birgjum og kröftugrar samkeppni á matvörumarkaði, segir í ávarpinu.
„Þetta þýðir að þótt framlegð hafi aukist í krónum talið vegna hærri veltu, þá hefur framlegðarhlutfall farið lækkandi. Með öðrum orðum, þá hefur kostnaðarverðshækkunum ekki verið fleytt af fullum þunga út í vöruverð. Þetta má telja mikilvægt framlag verslana Haga til baráttunnar við verðbólgu í matvöru á Íslandi, en undir lok árs var hún ein sú lægsta í Evrópu og sú lægsta á Norðurlöndunum,“ skrifa Finnur og Davíð.
Að þeirra mati telst afkoma verslana Haga ásættanleg í fyrra, þrátt fyrir þetta.
„Við teljum að þessi staðreynd endurspegli ágætlega styrkleika og samfélagslegt mikilvægi hagkvæmrar aðfangakeðju og skilvirkra verslana innan samstæðu Haga.“
„Fordæmalausar hækkanir og sveiflur á aðfanga- og vöruverði“
Í ávarpinu segir að árið hjá Högum markaðist af beinum og óbeinum áhrifum átaka í Úkraínu og síðustu eftirköstum Covid-19 faraldursins.
„Þar má helst nefna fordæmalausar hækkanir og sveiflur á aðfanga- og vöruverði, gengisveiking krónu, innlendar kostnaðarverðshækkanir, hækkandi verðbólgu og mikil og ör hækkun stýrivaxta.“
„Þessi blanda telst hvorki góð fyrir neytendur né verslunarfyrirtæki, og því má segja að ágæt niðurstaða ársins endurspegli vel styrk Hagasamstæðunnar til rekstrar í erfiðum aðstæðum,“ segir þar enn fremur.
Tekjur Haga 162 milljarðar króna í fyrra og jukust um 19% milli ára. EBITDA ársins nam rúmum 12 milljörðum króna og hagnaður tæpum 5 milljörðum.
„Heilt yfir erum við því sátt með rekstur Haga á nýliðnu rekstrarári og að hafa komið í höfn mikilvægum áföngum sem munu styrkja samstæðuna til framtíðar.“
Umsvif í starfsemi Haga jókst heilt yfir en það skiptist nokkuð misjafnlega milli starfsþátta. Ríflega 2/3 hlutar tekna Haga liggja í dag- og sérvöruverslun, sem jókst um nær 11% frá fyrra rekstrarári og nam tæplega 106 milljörðum.
„Þessi vöxtur skýrist annars vegar af miklum verðhækkunum frá framleiðendum og heildsölum og hins vegar af aukningu í seldu magni. Þar skiptir mestu að í árferði hækkandi vöruverðs og vaxta þá sótti metfjöldi viðskiptavina verslanir Bónus,“ segir í ávarpi.
Hægt er að lesa ávarpið í heild sinni hér.